[142] EPISTOLA XLII.

Q. SEPT. FLORENS

CHRISTIANUS.

Nobili & eruditiss. Viro

IANO DOUZAE NORTWIC,

Patricio Batavo-lugdunensi.

Regni hujus gallici, Douza Vir clariss. status laetus olim & invicienda forte exteris omnibus admirabilis, ita nunc mutavit ex •οχλοκρατιας• caeco furore, & speratae •ολιχαρχιας• temeraria ambitione vix ut ulla videantur superesse felicitatis, adeo nunc est illaetabilis ille & miserabilis, hoc uno adhuc felix quod aliquod vicinis gentibus, miseritudinem conciverit, inter quas Bataviam vestram numero, qui unus terrae angulus inter paucos videtur hodie velut inconcussus & tutus a crudeli tyranni illius •μελανος• usurpatione neque hoc solum, sed quia malorum non insciens imo doctus superbas fortunae vices expendere & vereri, optatus oppido patet portus miseris & afflictis. Eo factum est ut multi qui inter publica negotia, Musarum otia & secessum quaerimus, solos ferme felices Batavos existimemus, sive a gentis virtute sive ab auspiciis Generosi Principis & fortissimi ducis Comitis Nassovii qui non ex more stultorum Principum Nobilitatis verae gloriam in armatis solum hominibus, sed etiam in litteratis reponit. Tandemque intellexi non omnino vanam fuisse fidem Brocardi illius qui apud vos Prophetam non ita pridem agebat; quum toties nos de sedis tranquillitate sollicitos antea, & a patria exules moneret Batavos amare focos. Nunc quoniam mihi integrum non est vertere hoc solum non solum quia ego natura & institutione •φιλοπατρις sum & φιλοβασιλευς•, sed multis aliis de caussis, peto a te ut quamvis iniquis longissime spatiis inter se dissiti tamen nos amemus, jam veteres praesertim amici, vestrae felicitatis aura frui tantisper possimus quamdiu bonarum artium & litterarum quietum obtinebitis domicilium (quod voveo & spero vobis perpetuum, vel propter Scaligerum •μουσηγετιον• qui aderit vobis tanquam •θεος απο μηχανης•) ut scilicet nobis ne invideatis quicquid boni excudetur in nobili illa vestra Typographia, altero vestrae Academiae vestrorumque ordinum ornamento, praecipue si quid Scaligero, Lipsio & utroque Douza, aut aliis quorum judicium nomen in literis magna. Hoc ut a te eliciam ecce mitto tibi Andromacham Euripideam cum Notatis aliquot, veram nostrorum temporum imaginem ut tute ipso statim initio cognosces. Eam tantidem laudis pro pretio mereri volo quanti vel indicaveris vel iudicaveris. Parum enim abest quin eam scripsisse puditum sit postquam vidi actum me egisse quem ornatiss. & spectabilis Ratallerus vestras & vester olim edidit, sed qui sciam Arataei carminis versionem a Cicerone datam non deteruisse posteriora ingenia ab eadem re etiam felicius tentanda. Nemo, ut opinor, aequior arbiter id a me factum culpabit, qui me judice nefas putabit parare sibi laudem ex aliorum reprehensione vel potius obtrectatione. Vale Clarissime & charissime DOUZA. Vindocini. Pridie Kal. Maji. Anno servata per Dominum Iesum Christum humanitate MDXCIII.